Webgune hau cookiak erabiltzen ditu bezeroaren esperientzia hobetzeko. Webgunean jarraitu ezkero hau hobertzen duzula ultertuko dugu. Informazio gehiago Itxi

Berriak
Back to Top

Berriak

 

Bideoa: Emakume Master Cupen finalerako bost egun baino ez

Ikusi bideoa hemen

Emakume Master Cup


 

Ruiz de Larremendi familiaren egun handia Irunen

Pilota zainetan daraman familia da Ruiz de Larramenditarrena eta urteetan izandako pasio horrek bere saria izan du gaur Irunen, Maite eta Olatzek jantzitako Binakako LABORAL KUTXA EMAKUME MASTER CUP lehiaketako txapelak jantzita. Izebak, Iera Agirrerekin batera, pilota goxoko lehen txapela irabazi du Galeano ahizpei 22-7 gailenduta eta Olatz, ilobak, pilota mistokoa jantzi du, bere bigarrena lortu duen Leire Garairekin batera, Olatz Arrizabala eta Gentzane Aldairi 14-22 irabazita. Baina guztiaren gainetik, emakumeen pilota izan da garailea gaur Urantzu berrituan, pasa ditugunak pasa ostean, giro bikaina bizi ahal izan delako, erabilgarri ziren 351 eserlekuak betez, kanpoan jendea sartu ezinda geratu da, eta normalean gizonezkoei erreserbatutako telebista parrilaren zatia ikuskizun polit batekin betez. Partiden artean, Irungo 22 Academy dantza akademiak giroa berotu du bere ikuskizun berritzailearekin.

Pilota goxoko finalean, Iera Agirre eta Maite Ruiz de Larramendiren indar eta eskarmentuak ez die aukerarik txikiena eman Nagore eta Leire Galeanoren ilusio eta gaztetasunari eta nafarrek txapela jantzi dute 22-7 irabazita. Finalari emozio pixka bat falta izan zaion arren, esan beharra dago tantoak azken markagailuak iradokitzen duena baino lehiatuagoak izan direla. Gorriak 10-0 aurreratu diren arren, hasierako tantoak luze eta piloteatuak izan dira, baina azkenean beti nafarren alde erori dira. Izan ere, kolpez indartsusagoak izateaz harago, defentsa bikaina erakutsi dute Agirre eta Ruiz de Larrmendik eta Antzuolako ahizpa gazteei ezinezkoa egin zaie tantoa amaitzeko zirrikiturik topatzea.
Hori bai, tarteka finaleraino eraman dituen maila erakusteko gai izan dira Nagore eta Leire, ez dituzte eta alperrik sei partida irabazi txapelketa osoan zehar. Gaurkoan urduritasunak eragin die, baina ausart jokatuta, zazpi tanto egiteko gai izan dira eta etorkizuna eurena dela erakutsi dute.
Hori bai, gaur egun, Iera Agirre eta Maite Ruiz de Larramendiri txapelak kendu ahal izateko lan handia dute aurretik.


IERA AGIRRE-MAITE RUIZ DE LARRAMENDI: 22
NAGORE eta LEIRE GALEANO: 7


Pilotakadak: 416
Iraupena: 43,32
Markagailua: 10-0, 10-1, 14-1, 14-2, 16-2, 16-3, 18-3, 18-4, 19-4, 19-6, 21-6, 21-7, 22-7.
Sakeak: 2 Iera Agirrek
Tantoak: 6 Iera Agirrek, 2 Maite Ruiz de Larramendik, 1 Nagore Galeanok eta 1 Leire Galeanok.
Hutsak: 3 Iera Agirrek, 2 Maite Ruiz de Larramendik, 2 Nagore Galeanok eta 10 Leire Galeanok.



Pilota mistoko finalean, aldiz, Leire Garai eta Olatz Ruiz de Larremendiren freskotasuna eta kolpea izan dira txapela eman dietenak. Ideiak oso garbi zituztela kantxaratu dira gasteiztarra eta Eulatekoa, jokoa atzean Gentzane Aldairi karagatzeko asmo argia izan dute hasieratik, eta baita estrategia hori kantxaren gainean garatzeko dohainak. Eulateko atzelaria izango da, ezbairik gabe, gaur egun kolperik handieneko pilotaria eta pilota gehienak gozatu ditu, zulo handiak irekiz. Leire Garai ere oso ondo moldatzen da pilota klase honekin eta jokoa aurren nahastu beharrean, ondo asmatu du pilota ezker paretara baztertzen eta atzelari gorriari lana pilatzen.
Gauzak horrela, bigarren finalak ere lehenaren antz handia izango zuela zirudien bikote gaztea 0-9 aurreratu denean. Olatz Arrizabalaga, ordea, jokatzeko zegoen eta partidari eusten asmatu du. Sakearekin mina egin du gernikarrak eta tarteka partidaren erritmoa aldatzen ere asmatu du, partida estutuz (10-14). Garai eta Ruiz de Larramendik, ordea, berean jarraitu dute, huts batzuk pilatu arren, garaipena non zegoen argi izan dute partida osoan zehar eta, beste sustoren bat ere eraman duten arren (14-18) merezitako garaipena eskuratu dute. Txapelik eraman ez duten arren, Arrizabalaga-Aldaik ere badute pozik egoteko motiborik, pilota mistoarekin egindako lehen proban, txapelketa bikaina osatu dute eta.


OLATZ ARRIZABALAGA-GENTZANE ALDAI: 14
LEIRE GARAI-OLATZ RUIZ DE LARRAMENDI: 22


Pilotakadak: 467
Iraupena: 54,23
Markagailua: 0-9, 1-9, 1-10, 4-10, 4-12, 7-12, 7-14, 10-14, 10-18, 14-18, 14-22.
Sakeak: 4 Olatz Arrizabalagak, 3 Leire Garaik.
Tantoak: 5 Olatz Arrizabalagak, 6 Leire Garaik eta 4 Maite Ruiz de Larramendik
Hutsak: 3 Olatz Arrizabalagak, 5 Gentzane Aldaik, 5 Leire Garaik eta 1 Maite Ruiz de Larramendik

Emakume Master Cup


 

Txapelketaren anitztasunaren ispilu izango dira igandeko LABORAL KUTXA EMAKUME MASTER CUPeko Irungo finalak

Arazoak arao eta oztopoak oztopo, amaiera polit bat izango du igande honetan Binakako LABORAL KUTXA EMAKUME MASTER CUP txapelketak. Ez agian, duela urte eta erdi, Irungo Udala eta txapelketaren antolatzaileak, hitzordu hau prestatzen hasi zirenean espero bezalakoa, baina girorik ez da faltako normalean gizonezkoen esku pilotarentzat ETB-k gordeta duen igande arratsaldeko ordutegian jokatuko diren bi finaletan. Orain urte bete estreinatutako Irungo Uranzu pilotalekuan 727 pilotazale sartzen diren arren, igandean 351 pertsona sartu ahal izango dira, segurtasun neurri guztiak zorrotz betez, eta bertaratzerik ez dutenek ETB-1ean ikusi ahal izango dituzte bi final erakargarri hauek. Jaialdirako gonbidapenak www.irun.org helbidean lortu daitezke. Eta inor frontoira gerturatzeko gogoz geratuko balitz ere, gaurko aurkezpenean Borja Olazabal Irungo zinegotziak jakitera eman duenez, hurrengo urteko, 2021eko txapelketaren finalak ere Irunen jokatuko dira lortutako akordioaren baitan.

Kirol alorrari dagokionean, esan daiteke Irungo finalak txapelketak duen aniztasunaren ispilu izango direla. Bere izaera irekiak, parte hartu nahi duen emakume orok erabat zabalik ditu txapelketaren ateak eta hala era eta adin desberdineko pilotari ugari aritu izan dira Euskal Herriko pilotalekuetan zehar. Horren adibiderik garbiena izan daiteke Iera Agirre-Maite Ruiz de Larramendi nafarrek Nagore eta Leire Galeano antzuolarren aurka jokatuko duten pilota goxoko finala. Leitzakoa eta Eulatekoa aurpegi ezagunak dira txapelketan, 33 eta 46 urte dituzte eta eskarmentu handia dute pilotalekuetan. Debagoieneko ahizpa gazteek, ordea, 13 eta 15 urte baino ez dituzte, sei partida irabazi behar izan dituzte finalera heltzeko eta, ezbairik gabe, lehiaketako ezustekorik handiena izan dira. Belaunaldi arteko talka izango da finalekoa, emakumeen esku pilotaren orainaren eta geroaren artekoa, interesez betea.

Pilota mistoarekin jokatuko den finalak ere badu mamirik. Lehen aldia da LABORAL KUTXA EMAKUME MASTER CUP txapelketaren binakakoan material gogorragoarekin jokatu dena eta bertan ere estiloen arteko lehia izango da. Esan daiteke, Olatz Arrizabalaga eta Gentzane Aldai bizkaitarrak txapelketak izan duen garapenaren isla direla. Orain arte pilota goxoarekin aritu badira ere, Binakako honetan mistora jauzia ematera animatu dira eta emaitza ezin hobea izan da, finalerako bidea osatu dute eta. Olatz Arrizabalaga gernikarrak azaldu duenez, «eskuak eta ondo dauzkagu, nik uste gatzena lehen pauso hori ematea dela, behin ohituta, eta ondo egiten baduzu, azkenean jokatu daiteke. Ez da pilota oso oso exigentea, berea behar du, baina ondo moldatuz gero, ez dago arazorik».
Parean bi pilotari gazte, Leire Garai eta Olatz Ruiz de Larramendi, Maiteren iloba, izango dituzte parean. Bi pilotari auek ohituagoak daude pilota gogorragoarekin jokatzen eta euren kolpe biziari etekina ateratzen saiatuko dira.

Goizeko aurkezpenean Borja Olazabal eta Rebeca Gonzalez, Irungo Udaleko kirol eta berdintasun zinegotziak eta Laboral Kutxako Maria Jesus Bengoetxea eta Maria Bañares izan dira. Laurek jendeari Uranzu pilotalekura gerturatzeko gonbita luzatu diete pilotazaleei eta, batez ere, arduraz jokatzeko eskatu diete, festa erabatekoa izan dadin.

Emakume Master Cup


 

Final erdiak berriro aurrera

Aurkeztu berri da binakako esku pilota final erdiaren data berria. Partidu hau Elgoibarren jokatuko da hurrengo Ekainaren 21ean eta partiduak ondorengoak izango dira: 1. partidua, Ainhoa Ruiz de Infante - Amaia Jala vs Nagore Galeano - Leire Galeano. 2. partidua Irantxu Etxebeste - Ane Urkizu vs Iera Agirre - Maite Ruiz de Larramendi.

Emakume Master Cup


 

Ohar garrantzitsua

Erakundeek koronabirusaren inguruan emandako aholkuei eta eginbeharrei jarraituz, Emakume Master Cup-ek larunbatean Elgoibarren jokatu beharreko pilota goxoko finalerdiak bertan behera uztea erabaki du. Erabakia arduragatik eta pilotari eta pilotazaleen hobe beharrez hartutakoa da.

Emakume Master Cup


 

Arrizabalaga-Aldai eta Larrarte-Ruiz de Larramendik jokatuko dute binakakoaren pilota mistoko lehen finala

Euskal herriko hamaika plaza eta txokotan milaka emakumek egin bezala, frontoian, euren esparruan, jarri dute Binakako LABORAL KUTXA EMAKUME MASTER Cup txapelketan parte hartzen ari diren pilotariek berdintasunerako euren alea. Giro bikainarekin, Beasaingo frontoia betea eta maila oneko bi partidekin, goiza borobila izan da. Hori bai, sari nagusia Olatz Arrizabalaga-Gentzane Aldaik eta Miren Larrarte-Olatz Ruiz de Larramendik eraman dute, izan ere eurak izan baitira martxoaren 29an Irunen jokatuko den pilota mistoko final handirako txartelak eraman dituztenak.

Pilota mistoaren alde egindako apustua bikain irten zaie Olatz Arrizabalaga eta Gentzane Aldai bizkaitarrei. Orain arte beti pilota goxoarekin aritu diren arren, bikain moldatu dira material biziago honetara, oso bikote sendoa osatzen ari dira eta finalerako txartela eskuratu dute partida handia jokatuta, Amaia Aldai eta Arrate Bergarari 22-11 irabazita.

Hasieratik hartu dute markagailuaren kontrola bikote bizkaitarrek 7-1. Arrizabalagak partida hasiera bikaina egin du, erasoan asko asmatuta, baina nabarmentzekoa da Gentzane Aldaik jokatutako neurketa. Etengabe bilatu dute Aldai eta Bergarak Orozkokoa, baina honek defentsa bikaina erakutsi du bi eskuekin. Askotan dominatu dute tantoa arratiarrak eta Bergaran bizi den Tuterarrak, baina amaitzerakoan zuloa topatzea kosta egin zaie eta hor askoz eraginkorragoa izan da Olatz Arrizabalaga. Aurreko astean Getarian asmatu zuten oso kontra izan zuten partidari buelta ematen, baina gaurkoan oso aurkari sendoak izan dituzte aurrean eta ezinezkoa egin zaie.

Dezente gehiago kosta zaie 22. kartoira heltzea Miren Larrarte eta Olatz Ruiz de Larramendiri. Bidaniarra eta Olatzekoak faborito garbi bezala ekin diote partidari eta, hasieran alde batzuk pilatu dituzten arren, ezin izan dute partida hautsi. Kolpe bizia du eskuinez atzelari nafarrak, txapelketako indartsuena ziurrenik, eta aurrean, errematean, bikain moldatzen da Larrarte, bikote perfektua, hortaz, baina kosta egin zaie gaur euren jokoa egitea, batez ere gipuzkoarra ez delako oso emankor aritu erasoan. Hala, Leire Garai eta Nora Mendizabal partidan sartuta egon dira uneoro. Andoaindarrak atzean eutsi egin dio Ruiz de Larramendiren sasoiari eta, partidak aurrera egin ahala, Leire Garaik bikotearen zama hartu du eta pilota egoki mugitu du alderik alde. Partida 12-12 berdintzea lortu dute, baina markagailuan aurre hartzea falta izan zaie. Lehia luzatu den eran, nekea eta hutsak nagusitzen joan dira, urdinek alde nabarmenak izan dituzten arren, Garai eta Mendizabal berriz ere tanto bakarrera gerturatu dira, 20-19, baina atzera jota, atzelari gorriaren hutsak bilatu dituzte eta sendotasun horrek eman die finalerako txartela.

Irungo zita handi horren aurretik, ordea, hurrengo larunbatean ere bada jaialdi ikusgarririk, izan ere hurrengo larunbatean Elgoibarren jokatuko baitira pilota goxoko finalerdiak.

Emakume Master Cup


 

Emozio handiko jaialdia Villabonan

Binakako LABORAL KUTXA EMAKUME MASTER CUP lehiaketa ari da pixkanaka etapak erretzen eta pilotarien maila ere ikaragarri ari da gora egiten jardunaldiek aurrera egin ahala. Gauzak horrela, Villabonako pilotalekuan bildu ziren pilotazale ugariek lau partida orekatu eta bikainez gozatzeko aukera izan zuten.

Nabarmentzekoa da, aurreko astean Antzuolan bezala, Bartzelonatik etorritako bikote bat izan zela tartean –bertako kanporaketako onenak izan ziren Adriana Salat eta Miriam Ballesta– eta oso itxura eman zuten, nahiz eta azkenerako Nerea Sagarna eta Haizea Marijuan bizkaitarren aurka amore eman behar izan zuten 18-15eko emaitza estuarekin.

Are berdinduagoa izan zen Maialen Magunagoitia (Atxondo)-Jone Mateok (Lekeitio) eta Arantxa Arratibel (Ataun)-Aisha Etxeberriak (Amezketa) jokatu zuten partida, gora behera askoren ostean, tanto bakarraz (17-18), gipuzkoarrek eraman zuten garaipena eta hurrengo kanporaketarako txartela. Emozio handiko lehia izan zen eta pilotazaleek asko gozatu zuten.

Uharteko Aizane Ibarrola eta Bergarako Eider Zubizarretak ere lan eskerga egin behar izan zuten Kortezubiko Amaia Zarrabeitia eta Andoango Izarne Oiarzabali irabazi ahal izateko. 12-18 nagusitu ziren urdinak eta aipatzekoa da aurrelari nafarrak bi eskuekin pilota mozteko erakutsitako gaitasuna.

Jaialdiko azken partidan Antzuolako Nagore eta Leire Galeano ahizpek erraz xamar irabazi zieten (9-18) Aiora Armendariz (Irunberri) eta Haizea Salanuevari (Andoain). Galeanotarrak partida hasiera-hasieran erabaki zuten 10-0 eko partzial batekin.

Hurrengo jardunaldia Deban jokatuko da, datorren igandean, goizeko 11.00etatik aurrera (atxikituta jaialdiaren kartelera)

Emakume Master Cup


 

Binakakoa indartsu hasi da Ataunen

Leku gutxi frontoia bezalakorik neguko denboraleei aurre egiteko eta Ataungo Auzeota pilotalekua bete egin da gaur arratsaldean binakako LABORAL KUTXA EMAKUME MASTER CUP txapelketako lehen aurre-kanporaketa bertatik bertara ikusteko. Harmailetan 150 lagun inguru bildu dira, horietako asko Arantxa Arratibel, bertako alaba, animatzeko. Aisha Etxeberria amezketarraren laguntzarekin, ataundarrak lehen kanporaketa gainditu du, bertako pilota eskolako haurren gozamenerako. Azkenerako, giro beroa izan da egunetik egunera sendotzen ari den lehiaketa honen hasiera egunean.

Txapelketari hasiera eman dion partidan,  Nerea Sagarna (Larrabetzu) eta Haizea Marijuan (Santurtzi) bizkaitarrek Jaione Urania eta Irati Usandizaga oñatarrei irabazi diete 8-18. Debagoienekoek ez dute egun onik izan, Madalen Etxegarai eta Uxue Oses ere kanporatuta geratu baitira, baina berriro ere ordezkaritza zabala dute txapelketan.

Ikusminik gehien sortu duen partida izan da, halaber, orekatuena eta Arantxa Arratibel ataundarrak eta Aisha Etxeberria amezketarrek 18-13 irabazi diete Altsasuko Udane Vergara eta Alaia Ruiz de Infante gasteiztarrari, partida osoan aurretik joan ostean.

Eguneko beste interes puntu garrantzitsu bat Gentzane Aldai eta Olatz Arribzalagaren pilota mistoarekin jokatzen ikustea izan da. Material honekin ausartu dira lehen aldiz bizkaitarrak eta lehen proba oso positiboa izan da, ez baitiote aukerarik eman Oñatiko bikoteari (18-4). Uxue Osesek zailtasun handiak izan ditu Olatz Arrizabalagaren sakeak erantzuteko.

Azken doluan, Ibone Salinas eta Andrea Capellán errioxarrek Hiart Arakistain (Sopela) eta Miren Olondori (Bermeo) ez diete inolako aukerarik eman (18-5).

Emakume Master Cup


Berri zaharrak:

 

Aurreko txapelleta berriak